Servizos Sociais - Concello de Cabanas

A Área de Servizos Sociais é a encargada do benestar da veciñanza, detectando as necesidades e carencias sociais, traballando na prevención de problemáticas sociais e pulando pola inserción social. Ofrece intervención social personalizada, e de ser o caso, a prescrición técnica para a derivación ao servizo social especializado máis idóneo ou a outros sistemas de protección social.

A unidade está formada por unha traballadora social, unha educadora social e unha auxiliar administrativa.

O servizo dispón de atención ao público previa cita.

servizos.sociais@cabanas.gal

Axuda no Fogar

O Servizo de Axuda no Fogar (SAF) presta apoio persoal e doméstico para o mantemento na vivenda habitual da persoa beneficiaria.

O SAF do Concello de Cabanas está subvencionado pola Deputación da Coruña

Educación e Apoio Familiar

Servizo de apoio educativo e psicosocial dirixido ás familias e unidades de convivencia.

Unha das publicacións vencelladas a este principio de acción é o Manual de Emocións, que se pode descargar nesta ligazón (pdf).

Este servizo é subvencionado polo programa de financiamento dos Servizos Sociais Comunitarios Municipais da Deputación da Coruña

Programa de Inserción Social

Inclúe diversos trámites, como a xestión de prestacións ou o Plan de Inclusión.

Envellecemento activo

O programa Envellecemento Activo ten o obxectivo de favorecer o benestar das persoas maiores do concello, así como facer fronte ao illamento social.

Este programa lévase a cabo a través de obradoiros, nos que as persoas usuarias participan en dinámicas e actividades que promoven a saúde física, a estimulación cognitiva, o benestar emocional e a socialización.

Asemade, o programa forma parte dunha estratexia integral de actuacións cada vez máis especializadas no autocoidado e na autonomía desde distintos ámbitos da saúde física e mental en prol dunha mellor calidade de vida, especialmente das persoas que estean nunha situación de maior vulnerabilidade persoal e social.

Os obradoiros desenvólvense ao longo do ano en dúas modalidades:

- Martes de 11.00 a 12.30 horas na Escola Laica. Esta modalidade conta con opción de traslado en autocar desde o domicilio a Escola Laica e regreso.

- Venres de 17.00 a 18.30 horas na SCDR de Laraxe

Ademais, ao longo do curso, o concello promove a participación das persoas participantes en actividades especiais de carácter sociocultural como excursións, charlas, espectáculos, etc.

A actividade é gratuíta e está dirixida principalmente a persoas a partir de 65 anos, cuxa prioridades responderá a criterios biopsicosociais, de enfoque de xénero, de situación de vulnerabilidade persoal e social e de menor autonomía persoal e social.

O programa Envellecemento Activo é beneficiaria do Programa de subvencións a concellos e outras entidades locais para financiar actividades de envellecemento activo e actuacións de loita contra a soidade non desexada da Deputación da Coruña.

Cooperación e Solidariedade Social:

Abrangue diversos programas mencionados, como os seguintes:

Mencer na Escola. Servizo de coidado e atención ao alumnado do CEIP Eladia Mariño antes do horario lectivo.
Cabanas Concilia. Actividades para facilitar a conciliación persoal, familiar e laboral nos períodos de vacacións.
Tempo de Familias. Espazo de encontro, reflexión e intercambio sobre a crianza e a educación desde a perspectiva do apego e o bo trato. Conta cun correo electrónico propio: tempodefamilias@cabanas.gal
Club +60. Obradoiro de desenvolvemento persoal, social e cultural para persoas maiores.
Envellecemento activo. Espazo de participación e encontro das persoas maiores co obxecto de favorecer as relacións, prevención do illamento e reforzo de redes sociais de apoio.
Memoria dun século. Obradoiros parroquiais de historia oral e saúde comunitaria.
PAI As Viñas. Recurso de conciliación para o coidado e atención de nenas e nenos de 0 a 3 anos.
Facendo Escola. Accións socioeducativas dirixidas á comunidade educativa na etapa de educación secundaria.
Prevención de drogodependencias e de condutas aditivas. Proxecto de promoción e de educación para a saúde dirixida a toda a comunidade.
Programa municipal de voluntariado social. Actividades de voluntariado dirixidos fundamentalmente á dinamización sociocomunitaria.