O venres 1 de xullo, ás 19 horas, o Centro de Interpretación do Medio Mariño de Cabanas (CIMM), situado no Parque do Areal, acollerá a inauguración da exposición “Redes: o Porto e a Cabria”, que se poderá visitar até o próximo 15 de xullo, no horario de apertura habitual do Centro.
Ernesto López Naveiras, membro da Agrupación Instrutiva de Caamouco e gran coñecedor do pasado mariñeiro do porto de Redes, fará un relatorio que se completará cunha proxección sobre Redes desde os anos 1912 a 1950, onde se amosará a historia mariñeira, emigrante e labradora deste porto da ría especializada na pesca da sardiña.
A colección de fotografías que se poderá visitar no CIMM de Cabanas pertence á Agrupación Instrutiva de Caamouco, e foi recompilada durante máis de 30 anos, casa a casa, grazas á colaboración de todo o pobo. A través delas, poderemos coñecer a singularidade dun porto mariñeiro na súa arquitectura, a tradición pesqueira, as costumes e a vinculación coa terra e co mar.
Estas instantáneas inéditas da primeira metade do pasado século, constitúen un arquivo etnográfico fundamental para coñecer as tradicións do porto e as súas artes de pesca. Recolle elementos singulares como a lancha xeiteira, utilizada na pesca da sardiña coa arte centenaria do xeito, que faenaba a vela e remo.
A gran labor de recuperación de tradicións e documentación que vén facendo a Agrupación Instrutiva de Caamouco desde hai moitos anos permítenos gozar do patrimonio material e inmaterial do porto de Redes.
O Centro de Interpretación do Medio Mariño de Cabanas é un proxecto impulsado pola área de medio ambiente do Concello de Cabanas, e conta con financiación dos Fondos Europeos Marítimos e de Pesca, canalizados a través do GALP Golfo Ártabro Norte.
