O Salón de Plenos da Casa do Concello de Cabanas acollerá o luns 13 de febreiro ás 11.00h a presentación “12 razóns para que te sumes”, unha campaña de voluntariado social impulsada pola área de servizos sociais coa que se pretende facer de Cabanas un lugar “no que ninguén quede esquecido”.
“Na iniciativa participan doce persoas maiores ás que lles gustaría acoller a visita de outras veciñas e veciños para compartir un tempo de desfrute e compaña mutua, intercambiando experiencias vitais, ao tempo que se estimula a saúde mental e física e se prevén situacións de soidade e illamento social”, sinalou a concelleira de servizos sociais, Diana Rodríguez.
Desde o Concello de Cabanas convídase ás persoas que teñan interese en coñecer ás persoas maiores, compartindo o seu tempo como voluntarias, a informarse no teléfono 649 075 263 ou no correo servizos.sociais@cabanas.gal. Non importa a idade, as competencias ou o tempo do que se dispoña.
Como entidade de acción voluntaria, desde o Concello de Cabanas asinarase un convenio de colaboración coa persoa voluntaria, que implicará a realización dunha formación básica e a subscrición dunha póliza de seguros de accidentes e responsabilidade civil que cubra ás persoas voluntarias durante o transcurso de actividade. Ademais, as persoas voluntarias terán acceso ao Certificado de Experiencias Voluntarias.
