O Concello de Cabanas informa da posta en marcha da ludoteca Cabanas Concilia e do campamento deportivo, que se celebrarán durante os meses de xullo e agosto no apeadoiro do Areal e no pavillón do CEIP Eladia Mariño, respectivamente.
Na ludoteca Cabanas Concilia, destinada a nenas e nenos nados desde o ano 2011 a 2019, levaranse a cabo actividades como obradoiros creativos, xogos populares e actividades de natureza. Todas as actividades terán un enfoque socioeducativo, con perspectiva de xénero e serán promotoras do botrato.
No campamento deportivo, orientado a nenas e nenos a partir de 7 anos, desenvolveranse actividades para iniciarse na práctica deportiva de forma lúdica e promocionar un estilo de vida saudábel, incluíndo xogos acuáticos, baloncesto, bádminton, voleibol, hóckey, béisbol, fútbol ou balonmán.
As inscricións a estes campamentos poderán ser quincenais ou de carácter mensual, cuns prezos de 40 e 65 euros, respectivamente. As prazas asignaranse por orde de inscrición, e darase prioridade ás persoas empadroadas no Concello de Cabanas en primeiro lugar, e tamén, as persoas con matrícula no CEIP Eladia Mariño.
A solicitude de praza farase no Rexistro Municipal, presencial ou telematicamente, entre os días 29 de maio e 4 de xuño para as persoas empadroadas e/ou matriculadas no CEIP Eladia Mariño, e entre os días 5 e 11 de xuño, para as non empadroadas. Deberase incluír ademais a seguinte documentación:
- Solicitude cuberta para cada período solicitado
- Copia do DNI da persoa solicitante.
- Copia do DNI ou partida de nacemento da nena ou neno participante (ou libro de familia).
- Copia da tarxeta sanitaria da nena ou neno participante.
- Xustificante de matricula do CEIP Eladia Mariño en caso de non ter empadroamento no Concello.
As persoas que desexen máis información poden dirixirse ao 981 495 959, na extensión 6 ou 2 para o campamento urbano Cabanas Concilia, na extensión 3 para o campamento deportivo.
Cabanas Concilia | Ficha inscrición | Información familias | LOPD
Campamento Deportivo | Ficha inscrición | Información familias
